Nout pti prézidan Sarko la parti in rényon la-ba dann Canada. Sa té in rényon bann shèf d’État an shèf samdi soir, nout prézidan la fé in konférans-de-prèss. In zournalis la poz ali in késtyon pou konète si son minis Travay, méssyé Eric Woerth, lavé touzour son konfyans. Li la di oui « totalman épi konplètman ». Li la arzoute an plis, si i poz ali mèm késtyon landomin matin, li va fé lo mèm répons.
La plas méssyé Woerth, moin nora gingn la krintiv, pars son garanti i marsh solman ziska dimansh matin ! É apré ? Apré nana dimansh apré-midi, lindi matin épi lindi soir. Oui, sa lé byin vré, mé kouk va éspassé ? Pyès par pyès, informasyon apré informasyon, la di-la fé apré la di-la fé... lo sak lo boug i vyin plizanpli lour pou porté. Kansa sar fine tro lour pou ralé ? Kansa son bann dalon va komans larg ali in pé ? Pars la solidarité, sa sé pa in n’afèr natirèl pou bann la Droite, é moin lé sir in pé l’apré pèz lo pour, pèz lo konte, réflèshi, kalkilé. Kalkilé kansa i fo larg ali, lèss noiyé sak l’apré noiyé. Sov k’i pé !
Pou lo moman, bann gran zournalis l’apré pouss par dovan lo késtyonn l’ékip de France. Pou l’instan, pars so z’afèr i komans tourn an ron, fatig demoun, é ziskakansa niyaz noir va zoué son rol ? Ziskakan lo “leurre’ va fonksyoné ?
Zot i koné zourite ? I apèl sa pyèv. Kan ou i rode trap ali, li larg son bouyon noir. I oi pi aryin dan la mèr. Mé fors-a-fors, l’o la mèr i klèrsi é la flèsh lo shassèr i sava rode ali ousa li lé. Son dèrnyé l’èr l’arivé. An atandan, lo shassèr, dann son koin, atann in bon l’okazyon. An atandan, li shante in vyé shanson karnaval lontan, té k’i di konmsa : sote koman ti vé koko, toué lé pri dan la min korbo !

Justin