Pou fé la guèr Vietnam-Nord, lamérik la di konm de koi, bann ti-kanot Vietnam la atak bann gro-gro bato d’guèr amérikin. Lété pa vré, solman bann zamérikin la bonbard Vietnam-Nord. Zot téi kroi zot té sar fout sa inn pil alé oir zot la gouté.

Pou fé la guèr la di lo péi nana bann zarm “de destruction massive”. Té pa vré, solman la pèrmète azot kassé, brizé, détrui tout zafèr, dépotol lo Sadham-Houssen. Mé la guèr la pa arète sèk in kou konmsa. Mor par dsi mor, èl i kontinié é bann zamérikin lé riskab, in zour, kour kilot dan la min.

Astèr zot i rod tir lo pou dan la tète l’Iran. I prétan banna nana la bomb nikléèr, sansa i sava an avoir, sansa ankor, nana moiyin an avoir. Pou sa mèm, si i fo, zot lé paré pou alé tié sèt, blès katorz la-ba. Mank dé po, lo prop zéspion amérikin - i apèl sa la CIA - la fé konète l’Iran na poin la bonm atomik é i risk pa an avoir toutsuit.

Lo prézidan amérikin i rès kam, mé li rod ravaz guèp dann son ni. Li san son kor, li lé paré pou tir shomiz pou batay. Mé konm di in vié shanté mardi gra : « Sote koman ti vé koko, toué lé pri dan la min korbo ! »

Justin