Mézami, zot i koné papang mwin lé sir é sirman dopi lo tan zot lété marmaye. Koméla i di sa in léspèss dann danzé, é lé vré sirman, mé nou dann tan nou téi fé pa in ka èk sa. Sak nou téi porte an tansion sé pou noute volaye. Alor kan nou téi oi solman papang apré tourn-viré dann syèl, nou téi bate fèrblan, nou téi fé bonpé dézord épi nou téi kriye : « Papang volèr poul ! » é si la fantézi téi pran lo zoizo d’poze atèr pou trap nout poul ébin in voiyaz kou d’galé li té sir gagné. Mé si ni vé arvir dsi nout kozman, kossa sa i vé dir oziss ? Mi panss sa i vé dir : « Afronte out lènmi, pa bézoin sèye atandri ali, pa bézwin fé pityé, pars ou lé pèrdu d’avans. ». Alé ! Mi kite azot rofléshi la dsi é ni artrouv pli d’van. Sipétadyé.