Dék mwin lariv laba déor mi an souvyin, konm si té ékri si mon pinpin, promiérabor bann dalor la konpri, a ou in moun dayèr, pétèt èk mon manyèr kozé, mon manyèr may la lang, donkalor a shak éstan té i domann a mwin ousa mi sort ? Kèl koté mwin lé éné ? Koman i viv laba ? Si néna loto ? Koman i lé la kaz ? Aryink késtyon la kouyonis boudikont, mé kan ou koné pa, ou koné pa. Sanm pou mwin sa la pa in nafèr i apran a lékol. Pou banna ni kont pa tro.

Mi pran lo tan pou éspliké. Mi sort la Rényon, mon péi lé kosté èk madégaskar, maurice, sézèl…… tousala. A zot té i réponn : donkalor ou sort o zantyi alorss ? Non va mi sort pa o zantyi, mi sort la Rényon. Pou zot, la rényon, zantyi minm zafèr.konm diré lot, o plis mi ésplik, o plis i konpran pa. Kan ni antan sa dan la boush in moun bordaz shomin, ni pé di lé pa tro grav, mé kan sé bann moun la ot i di.

La zordi, par rapor moustik la ba zantyi lo minis la di pou bann madam i atan zanfan odrémié pa voyazé ditou outromèr, a nou osi dann ta. Pwatan isi nou na pwin problinm moustik ? Pétèt konm mon bann dalon déor li osi li konfonn ? Konbyin moun la ot mwin la finn antann i amay kan i sazi parl dé nou ? I koné pa ki ni lé, I koné pa ousa ni lé, i koné pa koman ni viv, i koné pa koué ni vo boudikont. Mi pans, épousa souvan-dé-fwa i pran a nou pou in mang a tèr !