I dor i lèv, i lèv i dor, shak éstan néna pou koz si zéléksyon. Ni sort dann inn tèr la, ni rant dann lot ki-sèk, san kass kontour. An souvyin a zot mwa d’mars, té zéléksyon minisipal, zis apré navé zéléksyon éropéinn, dann dé mwa ni atak 2015, sibit-sibit néna zéléksyon kantonal é apré zéléksyon rézional é apré, in pé apré, nankor zéléksyon prézidan èk lézislativ an 2017, donkalor néna ankor pou kozé pou lontan. Pa ryink pou kozé, galman pou èt an parmi osi. Alorss, in késtyon i romont toudinkou dan mon koko, koman fé pou èt paré zour la, pou èt a lèr ? In ! Boudikont zéléksyon la, lé in pé konpliké pou nou in pé sinp osi, inn sontousèl i pé roprézant tout. Kiswa in bonom ou kiswa in madam.

Souvan-dé fwa, lo minm lé mér, lo minm i pé èt dépité lo minm i pé dovnir konséyé tousala. Koman fé pou èt la, pou pa mank lèr, mwa d’mars ? Néna i di pou rézon si nou mank lo promié zéléksyon riskab nou mank tout, fo kour dérièr pou rofé, konm kan ti pran lo kar findkont, si ti pran lo kar, sad siz èr pou d’sand an vil, ti pé ropran sad midi pou rovni, dikou ti pèrd pa tro lo tan, mé si ti mank lo promié ti tonm an rotar pou lo rotour é tout lé dékalé, ti gingn pi rotrouv lo tan pérdi. Zéléksyon osi lé konm sa, si ni vyinbou korésponn èk sad mwa d’mars, lé sir mwa désanm nou va grandi ankor, dousman, dousman na rofé, sinonsa na romord nout dwa, nou minm .

Ankor trwa mwa pou byin travay, pou trouv lo méyèr tik-tak pou alé. Pou pa an awar tro rogré si la koup la manké. Néna lé pandiyè èk lo manda, néna osi i antass, konm i di i anpil inn si lot, ziska 2017. I di apré 2017 lé défandi antassé, minm i di bann moun la fé la lwa pou défann antassé a zot minm i kimil lo plis zordi. Alé konprann in nafèr ou. Lé vré pou vréman sak i bat lo bèr i lish son dwa. Souvan-dé fwa sé lo minm !