Mi souvyin parol in komik dann radyo. Boug-la té ki di konmsa : « Le mond i diviz an dé morso ; sak i kroi le mond lé divizé an dé morso, é sak i kroi pa ! ».
Moin pèrsonèl, mi pans le mond lé divizé an dé. Pars, pou komansé, banna la invant sak i apèl in sèy povreté. Par an-ba nana sinkant-dé pour san dmoun, é par an-o nana karant-uit.
Byinsir, sa i fé pa rir, parl in sèy povreté, pars sa i vé dir la moityé dmoun La Rényon i viv in vi dir é sa sé in n’afèr vré pou demoun tout laz : marmay-li, gran-moun li, gra-moun li, vyé moun galman.

In pé i doi mazine : inn-sé-zour la rou va tourné, alors zot nora sak i fo, pa an gaspiy, mé o moins an sifizans. Manzé konm k’i fo, in kaz byin prop, lo èk la limyér épi in pti plézir tazantan ; épi ankor in pti nafèr pou donn la famiy kan i rann vizit.
Solman, lo tan i pass, la mizèr i apèl la mizèr : karapat i mont déssi tété bèf mèg ! Épi si i oi in pé ariv ann-sou so sèy-la, i oi pa pèrsone alé par an-o. Sansa lé rar konm korn lapin !

Kissa la anparl in sosyété armonyèz ? In sosyété konmsa i pé pa ète armonyéz ! Touléka, sé sak mi pans.
É in sosyété konmsa, si i fé pa atansyon, sa lé riskab kass par bout. Na in prézidan la di : sa i apèl la fraktir sosyal.
Mi souvyin in moun téi shant, kan nou té la-ba dan la Frans pou poursuir nout zétid — sansa pou zétid poursuir anou ! — la kord i pète koté li lé faye ! Sa lé byin vré ! Moin sré byin-èz in pé i réfléshi la-dsi.

Justin