Oté

Souvan, la kouyonis i rovyin sher

Pol / 19 avril 2019

JPEG - 43.6 ko

Dopi kéktan, zot tout la romarké konm mwin, personn i koz pi problèm zanboutéyman i pouri lo kotidyin popilasyon la Rényion, mi antan pi ditou okin rouspétaz. Konmsi, nout tout la fine konsidèr so koshmar konm in fatalité, ou sinonsa konm nout kiltir, sansa ankor konm in patrimwann la Rényon ki fo konsérvé. Non sélman, lo kestyon la fine konm tabou, mé lo kantité loto név i fini pi gomanté. I vann konm ti-pin. Loto, ankor loto. Fransh vérité, mi konpran pi aryin.

Lo statistik promyé trimès sétané, i fé valwar in vant loto nèv anviron 10 % anplis par rapor dernyèr lané. Sét’in santé d’fèr, pou lo marshé loto, konmdiré in zournal, ék 8209 nouvo féray d’si la rout, ryink an trwa mwa, pou tyé domoun. Inn déryèr lot, i fé prés trwa fwa la longèr la rout litoral. Zot i mazine inpé ! Sa, i vé dir osi, disi la fin d’lané, nou nora 34- 35 mil zanzin – 150 km longèr - anplis pou gonf zanboutéyaz. Konmdiré lot, lapasé, mét ankor !

A propo d’sa, in kandida zéléksyon éropéinn , i sort déor néna dé sominn désa, la di dann télé isi, li néna in solisyon pou konbat koshmar zanboutéyman la Rényon : i fo pi fé ditou shomin , konmsa domoun i ashté arpi loto ! Li rév lo pov. Mwin lé anvid di a li : Alé tir in féy, don ! Shomin goudron, nou nora touzour bézwin, mé parkoté d’sa, i fo sirtou shomi d’fer. I fo lo tram, konm Paul lavé prévi. Tan myé, dayér si domin, lo minm bann zwav la konbat lo prozé, la antèr lo tram-trin, i dovyin résonab, i romèt sa si lo ray. Aprè, apél a li koman zot i vé. On san fou d’sa.

Mé, si domin, in prozé konma, i réaliz pou dovré, konbyin d’zané, nou nora fouti o dyab, konbyin d’zané perdi ! Konbyin d’zané d’kouyonis osi ?
Lo problèm, sék souvan, la kouyonis i rovyin shèr. Tout moun i koné sa.

Pol