Souvan dé foi, mi domann amoin pou kosa kékshoz i rosanm lé sinp épi li lé évidan, néna in bonpé difikilté pou fé rant dann koko d’moun : demoun i admète pa fasilman in sinp vérité. O sinonsa li pran in tan fou é mèm défoi li admète pa zamé.

Mi souvien kan spoutnik la fé lo tour la tèr sansa kan in lyètnan russ-téi apèl Gagarine - la fé son promyé voyaz dann l’éspas, na d’moun la di sa sé in fime é sa lé pa vré. I fo dir dann tan-la pou in zournal Paris-Match ariv La Rényon té i falé omoins kont in moi é pandan toultan-la té pli fasil fé travèrs bann fos nouvèl ké bann nouvèl vré. Mi rapèl mèm, kan bann zournal la di in moun i tard pa marsh dsi la line, moin la antann demoun dan l’égliz té apré di : « Bondyé i aksèp ar pa in n’afèr konmsa ! ». Kosa Bondyé té i vien fèr la-dan ? Sa mi koné pa.

Mi sava pa ékri tout kalité la bétiz moin lé fine antann dsi la tèr dopi lo tan moin l’ariv la. Zis in kozman dsi lo shikoungounya : moin l’avé in bonpé kamarad té i kroi pa in sinp moustik lé kapab kontamine la popilasyon konmsa. In vré zami la di amoin émoin la fine di sa dann in modékri : li kroi pa in sinp moustik lé kapab rann in moun malade alé oir kan li té i sava la pèsh bann gran maringouin téi pik ali san zamé fé tonm ali malad. Moin l’avé bo dir ali sa in moustik tig, té i falé oir ali avèk tout in bann moun nou té an parti ansanm apré ri bon kèr. Lo tan la pasé, la pasé, la pasé, mé zordi ankor mi koné in takonn moun i kroi touzour pa in moustik tig la gingn provok in l’épidémi konm sak nou la koni.

Lo saz i amontr la line, lo l’inbésil i rogard lo doi. Lé konmsa é pa otroman, an tou tan.

Astèr ni pé anparl réshofman klimatik. Si mi di sistèm bann kapitalis la mète an plas pou ésploite bann zénèrzi fosil la provok lo réshofman klimatik mèm si ni vé lo dérèglomann klima. Si mi di, sistèm-la lé apré mète l’om an danzé-pa la tèr pars la tèr i pé kontinyé son parkour sou in form sansa sou in n’ot-moin lé sir néna ankor in bonpé d’moun pou dir arète tourn fime la. Pars pou zot, sa lé pa otroman k’in fime. Mé dann fon z’ot palé klimatizé bann kapitalis lo kak karant, pou zot par, zot i doi bien rigolé zot ké la pèy in kantité savan pou prézant in vérité la pa la vérité é sé in n’afèr k’i kontinyé ankor zordi vi k’i paré ké lo prézidan amérikin la di li kroi pa tout bann sornète la.

Solman lé bien domaz pars l’om va rann ali kont tout lo bann konsékans lo réshofman kan li sar pyé di mir. Zour-la lé sir in bonpé demoun va rogrété avoir fé roul azot dann la farine, sansa pétète zot va di lotèr sé lo péshé lé z’om la komète sansa zot va di sa sé la fote grandyab sansa d’ot kalité la kouyonad. Alé oir, souvan dé foi, la vérité lé sinp mé la pa pars li lé sinp ké l’moun i aksèpt ali konm li lé.