Mi rapèl kan mon papa téi rakonte sa vi dann tan li lété marmaye, osinonsa kan li lété jenn, mwin l’avé linpréssyon mwin lété dann in térin inkoni-terra incognita. Lé shoz l’avé poin lo mèm gou, lo mèm lodèr, lo mèm koulèr ké sak mi koné zordi. Poitan la natir sé la natir, lo moune sé lomoune, la kiltir sé la kiltir mé fransh vérité mi rossan késhoz étranz, kékshoz i rossanm koméla mé san z’ète toutafé konm koméla.

Mé antanssion, mèm si la vi koméla lé pa konm la vi lontan, kan mi avanss an laz, mwin néna konm linpréssion mwin l’apré kour déyèr mon passé san avoir la shanss rankonte ali zamé... pétète zot va dir amwin i ansèrv arien d’kour apré son passé. Kan wi fé sa sé konm si wi kour an marsh aryèr. In pé i di i fo alé an avan mé mwin mi oi pa lé shoz konmsa : mi rode mon bann poin familyé, sak mi trouv lé pèrmanan, é sé sa k’mwin l’apré rodé.

Lo privilèz dé laz ? Mi panss sé sa. Avèk in prézan épi in passé lé dé ansanm apré mélanz dann oute tète, outekor, outekèr. Lé pa dézagréab pars sa i pèrmète aou triyé rante lo bon épi lo mové, lagréab épi lo dézagréab, kan ou l’apré rode oute souvenir. Souvenir, souvenir, nostalzi san z’ète tou an étan.

A bon antandèr, salu !

Justin