Mézami, dann mon zardin-mi apèl mon bitasyon zardin-an parmi in bann plantaz néna troi kat pyé mouroung. I pé gaskone amwin la dsi pars néna poin lontan mwin la antann in bone konéssans apré di : « In pé i trouv pi kossa planté ! »

Zot i di sa ! Di sak zot i vé pars mwin pèrsonèl mwin néna souvnir pyé d’boi-la. Pou komanssé konm tout rényoné (mi éspèr !) mwin la fine manz baton mouroung avèk la mori sansa tèl ke sé épi brède mouroung in pé i kriy brède médaye. Tanka lo pti flèr blan déssèrtin i di li néna lo gou guèp fri kan wi tourn-tourn ali in pé dan la poil… Mi rapèl ossi kataplas lékors téi an sèrv défoi kont rofroidisman. Mi rapèl bien kan bann déssandan malgash téi vien dan la kour mon gran-mèr Berthe pou domann kisoi lo brède, kisoi lékors, déssèrtin lo rasine pou sèye guéri zot famiy. Guéri de koué ? Mi koné pa.

Sé pou sa, kan mwin la nyabou gingn in kaz, pyé d’boi - la, la trouv natirèlman son plass é demoun la domann amwin, konm téi domann mon granmèr, de koi ranpli zot boujaron sansa soign zot maladi-mi di pa lakèl, pars in pé va ékrir amwin pou domann amwin kèl maladi, kèl dozaz, si i fé griy lo fèye si i fé pa, si i ansèrv la poud, si i mète bann rassine a tranpé. Mi arète la pars zot i koné mi ékrir dann zoinal mé pou la konèstatir bann plant lé pli proférab domann in moun de l’art.

Astèr mon késtyon : sa lé la pou nouri nout majinasyon sansa pou nouri nout kor épi songn déssèrtin maladi. Mi panss lé troi : i fo nouri son majinasyon pars sansa la vi lé tro matèryalis, tro tèr-a-tèr, in pé va di tro prozaÏk – donk tout sak mi yèm pa. Lé bon po médikaman é pliské : Pi déor i apèl sa moringa épi sa i rant dann la farmakopé mondyal. Alor, mouroung la pa solman in késtyonn souvnir mé ossi in késtyon lotonomi alimantèr, épi in késtyonn santé… In pa dann diréksyon l’avnir.