Mi souvien néna in bon paké d’tan, moin té i sava lékol boi d’nèf Sin-Dni épi moin téi sava katéshis Sint-klotid. Rant lé dé sink kilomète a popré. Alor mèrkrodi soir épi samdi soir avèk mon frèr Alain épi mon dalon zozèf nou téi dsann Sint-Klotid. Sink kilomète ? L’avé l’tan pou fé la kouyonad Landomin, dsi l’kou d’onzèr nou téi romont Boid’Nèf pars té laba nou téi arèst-lékol boi d’nèf, nout momon té dirékris laba.

Donk in soir, apré katrèr nout troi dalon i dsann Sint Klotid par shomin Bankoul. Tout la zourné zozèf l’avé fé lo vèr avèk in pti kanif. I falé oir sa : l’avé in shène pou tienbo lo kanif é lo lam pa pli gran ké lo pti doi d’inn min pou lo pli gran. Ni dsann é la plipar d’tan nou téi pran santyé té i koup dann kann. An-o d’lo pli gran santyé ni kroiz mésyé Tizonm : in brav boug mé aparaman li téi yèm pa demoun i toush son kann…

Oila ké dann milyé santyé zozèf i désid ésèye son kanif. Li tir sa dann son posh, li dékrosh la shène. In kann koush atèr, sa i fé l’afèr. Zozèf i mète a tap lo lam dsi lo kann. Sa téi fé : « Tak ! Tak ! »mé lo pti brui téi port loin, sirman ziska zorèye mésyé Tizonm. Oté ! rosh i mète a volé. Promyé rosh moin la fine ariv an ba d’santyé. Dézyèm, mon frèr la fine rozoinn amoin. Zozèf i tap mèm pti kou d’lam kouto : « Tak ! Tak ! Tak ! » érosh i vol. Alain i kriye : « Zozèf vien Aou ! galé i vol la ! »

Lo tan mon dalon i lèv. Lo tan li fé : « A ! A ! A ! ».lo tanli pliye son pti kouto. Rosh i vol mèm ! Lo tan li alkrosh son shène é li pran la désant : in tan in kroiyab pou moin, in tan i fini pa é oila lo troi shenapan i mète a kourir an dsandan.. In pé pli ba, l’avé vèrjé mésyé Fénouss. Zozèf i vé roésèye son kanif. Ala ké ni pète kou d’galé dann pyé mang karot. Mésyé Fénouss lété apré kass mang. Oté ! in bordir d’zirman la dsann dopi an-o pyé d’mang ziska an ba.

Ala ni kour ankor in kou. Ala ké ni pik an dsandan… mé landroi nou téi sava téi apèl l’alé Mang, sé dir azot si nou l’avé ankor lo tan pou shaboul galé é pou ésèye lo kanif. Mi pans sé sak nou la fé.