Lo pti bouké d’in dénomé Parl Pa !

Parlpa lété in marmaye téi frékante lékol Boi d’nèf Sindni. konm li téi parl pa toute marmaye, même son famiye d’apré sak i di, téi apèl ali parlpa. Pé s’fèr li téi apèl sostène, mé o fon mi rapèl pi pars pou mwin konm pou toulmoune Parlpa lété son nom.

Parlpa lété in marmaye zantiye épi sèrvyab. Li téi adore la diréktriss – mon momon par l’fète – é son pli gran plézir lété d’fé plézir madame-La. Mi diré pa zot li l’avé lo méyère plass dann la klass la diréktrisss pars zot lété kat-sink assiz otour d’in gran tab é zot téi fé prèss pa arien sof bataye lé z’inn avèk lé zot, é dor dsi la tab kan lo bataye té fini.

Mé kan l’avé in n’afèr d’ote pou fère ké lo travaye lékol promyé volontère zot même, promyé pou rande sèrviss madame la dirèktris zot kèr lété débordan d’lamour pou èl.

Kriké ! Kraké !

In matin madame la diréktriss la domande Parlpa si li lété volontère pou amenn gouté pou son mari apré travaye dopi fénoir lo matin dann bitassion. Parlpa dakor ! Si tèlman dakor sirtou kan lété fine ésplike ali sa par zèst é kan I di ali li téi sava avèk lo nové la diréktriss – in dénomé Pti zak – épi in zanfan la diréktriss.A troi in néstan zot l’avé lo tan pou alé bitassion é rotourn avan la klosh i sone pou rante dan la klass.
Alé ! Lé zonm d’afèr parti. An kouran siouplé. I tarde pa pou lo rotour… Mé oila zour-la zot la mète pliss lo tan ké dabitide. L’ère rante dan la klass l’arivé é lé troi zonm d’afèr lé pa la. La dréktriss trakassé téi domande kossa l’ariv banna.

Névère té pa loin soné kan zot l’arivé mi pé dire azot lo lakèye lété pliské fré. Touziss si la pa ral dsi zot zorèye é mète azot pini.

Anfin, koman koman la mète lo troi ishakinn dan son klass. Parlpa an dèrnyé. Mé kan l’ariv lo tour lo Parl pa la métrèss i oi ali fouye dann son posh pou trape kékshoz té bien fonssé épi li la tire… in bouké flère bitassyon, bien krazé mé k’téi san an kor bien bon.
Oila ké li trape lo bouké, son léskize épi son prétèks, la mark lamour li néna pou son métrèss. Ala in bon métyé si li pé aporte aou bande zèss konmsa.

Kriké ! kraké ! Koton mayi i koul, rosh i flote ; l’avé inn foi pou inn bon foi méssyé lo foi la manz son foi èk in grin d’sèl.