Yèr, konm lo tan la donn in lanbéli, mi sar fé mon komisyon é konm nou la finn désot an plin dann tan zéléksyon rézyonal, ala lo moman pou koz in pé èk domoun si léta nout péi. Dan la boutik, nou la tonm vitman dakor si sizé zéléksyon mwa désanm. Pou sa késtyon i mank pa. An ou minm kisa ou wa i pé rantré ou la ? Dapré ou, nou lé riskab ariv dovan ? I di so linyon la sé pou 20 an, ou krwa pou vréman ? Sondaz i donn fanm la dovan, ou kwa lé vré ? Kisa la di sa sé in zéléksyon i intérès pa d’moun ?

In kamarad i di a mwin konm sa li vé koz in zafèr pli séryé, li vé koz si zafèr travay dann son lantropriz. Dopi lo tan li travay, tanto va fé 25 an, dopi tan la li gingn lo smig, li gingn aryink 1200 é ros. Lo salèr i bouz pi, li di. An minm tan li di osi konm si pou li son bwat i tang. Li na linprésyon travay pou do ri-kui ousinonsa pou la po patat vik li gingn pa boukou, i mank a li touzour inn ti kat-sou pou fé in éro. Boudikont li pé pa ashté gran shoz.

Na dé-fwa ou lé oblizé donn rézon kisa i apartyin. Lo salèr dann lantropriz i argard pa la rézyon, shakinn son shakinn. Pétèt inn i pé kondisyonn lot, mi andiskonvyin pa. Sépousa ni di mwa désanm, ni vot pou inn Rényon nouvèl, in ot manièr fé la politik, pou fé otroman. Pousa fo èt dakor pou rovwar nout léstati .E si nout tèt de list té dakor osi pou rovwar nout léstati ? Is pouré. Sré in bon débi d’komansman pou fé linyon !