Oté

Statistik étnik : Oussa i lé lérèr-la ?

Justin / 20 novanm 2007

Gramoun l’INSEE la fine blan konm dra simitir. Na lontan solèy la fine kapote dan la mèr, talèr bar d’zour i sava arivé. La, li lé antortiyé dann son kalkil statistik étnik : koman i fé pou kalkil popilassion La Rénion par nassion ? Tourn l’afèr konm i vé, nana toultan in lérèr. Ala li arkomans son kalkil :

Nana 700.000 moun i di an parmi zot zansèt lavé bann fransé, donkalor 700.000 éropéin. Nana mèm kantité i di zot na zansèt malbar donk mèm nonm zindien. Nana ankor parèy pou sak i di zot zansète lé afrikin, i fo armète sa ansanm. Azout ankor sak i di zot lavé zansète malgash, donk 700.000 an plis... épi shinoi, épi komor étsétéra, la ké lo ra... Sa i donn kat million nèf san mil moun san konté lo bann kont-nassion. Donk, i pé di nana sink million é kèk moun i rèss La Rénion.

Bondié ségnèr, na in lérèr la-dan, mé oussa li lé ? I prétan dir kuizinié Louis XIV la tié son kor pou moin ké sa... Ala k’li zète in zié déssi laktialité : konsèy konstitisionèl la désid rash lo kro lartik 63 la loi dsi lémigrassion. Donkalor, pi dé statistik étnik. Gramoun l’Insee lé soulazé. Li va mète la kord in n’ot foi.

Justin