Dépi in bon koup de tan l’UMP, la pil lé in pé plate. Li té i kroi, li sar tié sèt blès katorz : par l’fète gingn zéléksion. Mank dé po, la pa di tou konmsa lé shoz la éspassé. Parl pa la-ba dann la Frans, mé issi dann La Rénion. Ni koné kossa l’arivé.
Mé l’UMP la pa ronons arlèv la tète.Mé kissa i sava lèv brankar-la ? nana in kozman i di konmsa « In pé i vol pou sokour la viktoir ! ». Na un n’ot i di : « la défète sé in zanfan tou sèl ! ». Alor, zot i konpran, pèrsone lé pa préssé pou ramas la dépouy lo parti lo prézidan.
Pou anshevé, dézord dann park kanar : inn i ral, l’ot i pous, kozman an grènn i fiz. Anfin lèr la rékonsiliasion la pankor arivé. Azout ankor, in pé i di konm de koi, la droite la bézoin in parti rénioné. Oté, ala grinn bébé dann panié mayi ! Ala lo vèr dan lo frui ! Ala fourmi dann ni moush a mièl. Lo séparatism i mont lo bout son né !
Bann Paris, i pèrd pasians, i di kossa i fé la ? Kèl trin, kèl trin sa ? In pé i di konmsa : « Nou v’alé oir Sarkozy ! Oté la lé mol-la ! Prézidan lé riskab zok azot ! »
Poin final ? Ala k ’mi sort antann dann télé, l’UMP Paris la déside mète in fran gouyav de Frans pou armète son kaz debout. Pétète, zot la rézon, pli sir zot na tor ! Syndrome gouyav de Frans, mi pans pa sa i pass ankor...

Justin