Oté

Talèr, fodra bar la rout pou gingn inpe la pli !

Justin / 15 mars 2019

JPEG - 43.6 ko

Souvan, souvan, ni antan lo kozman i di, i shant osi : Apré la pli, bo tan, ou sinonsa, zordi la pli, domin solèy. In lesprésyon popilèr, in zimaz pou di konmsa, zordi si lé shoz lé an kittabouèt, lé mol, mé domin i sora méyèr, pli dos. Antouka, lo pansé lé byin imazé, mé lé pa in réalité ékzak, kan nou néna afèr la pli ék soléy pou dovré.

Rogard zot minm, dopi kék mwa, ék lo détrakman klimatik, la pli lé oki, li kasièt sépaou. Tanzantan i gingn innti pisa lo swar. Sinonsa, tou lé zour, riyink solèy aprè soléy, soléy zordi, soléy domin anplis lo problèm la shalèr i fini pi. La pa pou kriyé, mé tro soléy, néna aryin d’bon ladan pou bonpé. Akoz Lo zafèr i konplik, ék la pli i tonm pi, la Rényon l’apré v’ni an graton. In pé partou, ti plantèr i komans fé la grimas. La ba, dann lé o Sirk Salazi, shoushou i fé pi lo rwa. Lo bann tréy i di la priyèr, é lo détraw shoushou réskapé lé paréy la fé la gèr, i donn pa ou lanvi manz a li, sirtou lo pri li kout. Si i kontinyé konmsa, talèr fodra bar la rout pou réklam inpé la pli !

Mé na pwin sélman problèm plantèr. Néna osi lo konsamatèr i pran lo shok , sankonté lo takon désagréman pou la popilasyon bann komine la pa fé aryin dopi karantan pou lalimantatyon dolo. Sintandré, an tèt, la fine donn kou d’siflèt pou ferm robinet, lo swar, pou intèrdi lav loto ou aroz dé pyé flèr la pou griyé. Bingn vite avan fénwar, bros lo dan bonèr, si ou vé dor konm in moun.

Pourtan, zot i an souvyin kan Paul Vergès té Mèr lo Por, Virapoullé minm lavé promèt v’ni nétoy lo Por ék kamyon dolo Sintandré ! Pa pli tar, mwa dernyé, lo mér la rakont ankor, tard pa li sar vann dolo la komine dann boutéy. Foutor, va ! La lang la pwin lo zo.
Mé, dann tousa finalman, lo mank la pli, i aranz Virapoullé. Pou anlav son min, sak fwa néna in problèm dolo, li mèt sa d’si lo kont la sésrés. Mé tansyon pangar loraz !

Pol