Donk madam-la téi di koman konprande bann maron la fé la guèr lontan é demoune i koné pa koman zot la fé, kèl koté zot téi réfijyé, koman zot téi amenn zot guèr. L’èrla in madame la di pou toulmoune antande : « Sa té in bande voiyou, in bande térorist èl la di é dann son famiye antouléka lété sak bande vyé moune téi di ! »

Pou mon par mwin la di :« Toultan ké lyèv i konète ar pa ékri, sé lo shassèr va rakonte son vi, é li va rakonte son fasson ali, pa la fasson lyèv nora rakonté si li téi gingn kominiké ! »

Mézami in n’afèr sèryé mi panss, sé ké sak i koné ékri épi sak i koné kozé — kominiké — sé zot, final de konte k’i rakonte lo passé é i fagote an mèm tan lo prézan épi lo fitir. Mézami sak i ékri, sak i rézone, épi sak i fé travaye son majinassion, sé li k’i pran lo kontrol : sé li ki di sak lé bien épi sak lé pa bien, sé li k’i rakonte koman lété lé shoz avan-in tan wi koné pa é li ossi li koné pa mé li fabrike so tan-la é sé li k’i rakonte donk sé li ké néna rézon.

Mon vyé famiye la rakonte amwin in zour dann Sint-Klotide, in zour, Gasparin in om politik dann tan lété apré fé in diskour avèk bande zoli mo, bande zoli fraz, li téi di mèm détroi kozman pou fé rir é l’avé in bon pé d’moune apré ékoute ali ; bande shantèz légliz ossi téi ékoute ali é toudinkou in shan tèz la kora, la di :

« Bravo ! Bravo ! Sof kouk ti di, mé k’ti koz bien ! »

Mi koné pa sak zot i panss de sa mé mi pé di azot sa i mérite ni rofléshi la dsu. Mi panss solman sa i done azot lanvi po rofléshi, pou konprande, pou rode lo diskour vré pou fé pass in lidé vré. Sé sa ké lé kapital, zot i panss pa ?

A bon ékoutèr, salu.

Justin