Matant Zélida la ékrir justin :

Mon shèr nové, mon spès salté, rouj-de-fon dovan l’étèrnité,

moin lé a d’mandé si ou i tranp pa out plime dann la bil avan komans ékrir. Pou kosa mi di sa ? Pars, kan i lir z’ot zournal, na poin arien lé zoiyé, tout lé tris, tout lé grav. I diré nou lé konm kondané pou éshoué dann tout sak ni fé. Lé vré, konm i di, i parl pli souvan dsi bann kar i ariv an rotar ké dsi sak i ariv a l’èr, mé kant mèm toulmoun i pé oir mésyé Didie l’apré réisi dann son politik pou fé avèk La Rényon in péi k’i réisi, in zénès k’i avans, in bann voizin kontan avèk nou. Tout fason, koz aou si ou i vé kozé : lo shien i aboy, i pèrs pa trou dann la rou l’oto. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,

Si mi ékout aou bien, demoun lé éré, isi La Rényon, i mank pa nou arien, sak ni rod ni gagn ! Lo syèl sosyal lé blé, si mi ékout aou, li lé blé partou ! Matant, dann kèl mond ou i viv don ? Dann lo dézyèm mond ? Dann sak i mank près pa arien ? Pa dann lo promyé mond, pa an parmi tout sak i rode travay é i trouv pa, pa dann tout sak lé dsou lo pa d’port la mizèr, pa dann la zénès dépité, pa dann la viéyès abandoné ! Sansa ou lé dann promyé mond, sak i rès kapoté dann kanal-dsi lo bor d’shomin !- é ou lé androgé par la pib ofisyèl ! Tou l’moun li lé bo, toulmoun li lé zantiy sof inn-dé tomat gaté dann panyé ? Sa sé lo fonn komèrs la pib ofisyèl.

Matant si lo péi lé trist, i fo k’nana d’moun pou di li lé tris ! Si lo klima sosyal na plin gro niyaz noir, i fo na d’moun pou an parlé ! Si nout sosyété lé bazé dsi l’inégalié, i fo d’moun pou kriyé ! Ou i vé ou i vé pa, mé konm i di, tanmyé si néna bann lansèr d’alèrt dann péi-la ! Tanmyé pou nou si nout péi lé pa pèrdi san pour san ! Tok ! Pran sa pou ou !