Mésyé, Médam, La Sosyété koz èk moin sé koz èk in kouyon, mé sé o pyé d’lo mir k’i oi lo bon mason. Mé zami, kozman an-o la sa i poz problèm sa. Pou kosa mi di sa ? Pars fitintan moin té i pans lo tan lété in produi a pa gaspiyé. Lo tan k’i pass té i doi z’ète in tan itil : ki soi dann lékol, kisoi dann zétid, kisoi dann travaye, kisoi mèm dann loizir. In tan moin téi pans sa, mé astèr mi pans pi san pour san konmsa pars ofiramézir moin la viéyi moin la trouv d’ot tan itil. Lékèl ? Dabor lo tan pou révé pars révé la pa pèrd son tan. Aprésa moin la trouv ankor lo tan pou l’imazinasyon, lo tan pou la kréasyon. Pars boudikont shakinn néna son (sansa sé) bite dan la vi é sé par raport son bann bite li doi aprésyé lo tan. Lo tan lo poète, la pa mèm zafèr ké lo tan l’om d’aksion. Lo tan lo filozof la pa konm lo tan lo travayèr é biensir la pa lo mèm ké sète lo kapitalis. Alor, si zot i vé, mi kité azot rofléshir la dsi é ni artrouv pli d’van. Sipétadyé.