Matant Zélida la ékrir Justin :
Mon shèr nové, mon spèss salté, rouj-de-fon dovan l’étèrnité moin lé sir yèr soir ou la ékout nout ti prézidan apré anparl la lite kont lo kovid. Mi éspèr ou la fine konprann sé in onm arivé : la pa lo kalité i koz pou kozé, sansa k’i koz la boush rouvèr, mé in l’antropronèr bann gran shantyé konm i di. Konm bann zansien téi di sé in om de byé. Anplis ké sa kan pèrsone na pi d’solisyon, li, li trouv ankor. Alors ? Alors mi konpran bien zot bann rouj zot i yèm pa li par anvi, par zalouzri, épi pars zot i rann azot kont dann zot fonnkèr, li lé pli for k’zot. Antouléka, mi pé dir, moin pèrsonèl mi admir a li. Tok ! Pran sa pou toi !

Justin la fé po répons :
Mon vyé matant k’i koz la boush rouvèr, i étone pa moin ou néna bon konsidérasyon pou Prézidan-la épi ou i oi tout sort bon solisyon mèm kan li na pi arien d’nouvo pou propozé. Matant lé pa posib ou i lèss aou roul dan la farine par in boug konmsa avèk plis tourna dann son poilitik ké la rout Silaos-la rout kat san viraz konm in pé i di. Matant ou i rapèl lo pti kou d’mask k’i sèrv pa arien é dé-troi moi apré sé la solisyon dan la guèr kont l’onm invizib. Matant ou i rapèl la promèss goumant lo nonm li an réanimasyon pou pouss sa ziska douz mil ébin konbien néna zordi ? Sink mil, sis mil ? La pa fé d’ti matant. Ou i rapèl lo vaksin pou l’iotone ? Ousa i lé sète afèr la. Alor matant, la pa bézoin fé prann anou po d’shanm pou pla kouvèr, makaroni pou la bouzi.
Tanka out zonm de byé, délivré nou ségnèr. Tok ! Pran sa pou ou !