Débate-par dsi débate déssi la késtionn lo kou d’la vi. Sobate-par dsi sobate déssi nivo d’vi bann ti-kolon ! Mé kossa sa i shanj ? Pa granshoz ! Sak nana nana mèm, sak na poin na poin mèm...

Pandan in pé d’tan gouvèrnman avèk tout bann éspésialis i okip bann shif la di, pouvoir d’asha bann salèr i goumant, akoz si lo bann pri i mont bann salèr i mont plis ankor.
Sharjèr d’lo ! Zordi la pi moiyin manti konmsa, vik demoun i kroi pi lo bann rakontèr d’krak, bann passèr la pintir, bann i vé fé pran anou po d’shanm pou pla kouvèr, makaroni pou la bouzi. Alor lo bann éspésialis i rokoné la vi lé pli shèr é lo pouvoir d’asha bann salèr la béssé. Parl pi bann ti-rotrèt, ti-larzan shomaz, ti-larzan érémi.

Mé olèrk trouv in manièr pou arondi in pé lo pla demoun, l’apré tash moiyin fatig anou an plis. Ala inn i di konmsa mète tin taks déssi bann gro sansa moiyin loto, pa rienk kan i ashète mé shak ané konm in sort vignète. La, l’apré gingn lo gou-la : ala k’i di i fo mète in taks déssi bann télé, bann frizidèr, bann four éléktrik. L’apré fé in manièr pou rann la vi ankor pli shèr.

Apré alon kozé, la boush rouvèr par préférans. Alon fé kroir d’moun i fé in n’afèr pou bann ti. Pandan s’tan-la, tan pir k’i sava, tan pir k’i ral anou déyèr !

Justin