Mézami mi rapèl in foi dann karo d’kane l’avé plizyèr travayèr téi koupe shakinn son ta, mé anparmi l’avé inn téi apèl Oguiss é lété pa in famé koupèr ? Si tèlman lé z’ot téi kass ali ti-boi. Zot téi di : wi oi pti paké kann Oguiss la koupé ? Fyé pa dsi son grossèr pars tanpir k’i tir sé tanpir k’néna, tanpir k’i tir sé tran pir k’néna.

Dizon sa i doizète in l’advèrb o supèrlatif antouléka sé konmsa ké mi oi lé shoz.

Banna nora pi dir : opliss i tir, opliss néna… toutefasson sa lété in fasson pou mète Oguiss an boite. Mé pou dir la vérité li téi fash pa, li téi fash pa zamé. Oguiss lété konmsa, son kalité épi son défo.

Alé toussa pou nou anparl « Tanpir… Tanpir.. » sansa « opliss… opliss… ». I di galman tanpir k’i pé. Mi kite azot rofléshir la dsi é ni rotrouv pli d’van, sipétadyé.

Justin