Zot i koné zoué domino ? Moin près pa, pars sa in n’afèr moin la fé kan moin lété jenn, kaziman marmay mé sa in kékshoz la zamé ral amoin pou vréman. Kan moin na in tan mi profèr révé-sa oui ! Sa mi èm ! Donk kan moin la sèy zoué lo domino, moin la romark in pé té i sèy fioné konm dann tout zé. Dann tan té i apèl sa in zonou. In lébzanp ? Ou la poin morso troi, ou i mète in morso kat épi ou i fé konmsi arien n’été... mé la plipar d’tan bann zouar i fé antansion i kol aou, i fé artir aou out morso é ou lé blizé répar out lérèr.

Pou kosa mi di sa ? Pars la-ba Sint-André na in drol trikmardaz dann la méri. Na in mèr élu avèk in for majorité sé Virapoullé… mé lo moun i sort ète kondané pars na dé z’afèr pa korèk la s’pass dann in l’amikal pèrsonèl kominal si tèlman ké lo lansien mèr- lo mèm ké lo nouvo, par l’fèt- lé intèrdi sign bann papyé sak i apèl l’ordonansman. Konm li lé interdi, li lé mèr kant mèm é a s’ki paré sé promyèr adzoint madam Chane-To ké na lo délégasyon. Normalman tribinal n’oré pi désid in inélézibilité, mé na d’moun na plis la shans ké d’ot. Moin la antann dsi rényon promyèr lo mèr apré di li la suiv sak l’éta la di ali. Bon pou sa mèm, na oir la suit si nana in suit.

Solman an atandan, si moin lété lo délégatèr, moin nora méfyé d’sa, é bien avèy sa konm lé dsi l’fé. Pou kosa ? Pars, mazine in kou dann lo bann papyé noré inn sré pa tro katolik, inn k’i pé fé an-nuir aou in zour. Mazine in kou ké ou i sign sa lo zyé fèrmé - dé foi léspri lé pa la- dé foi ou i konpran pa bien in n’afèr, mé konm ou na out fyèté, ou i vé pa pass pou in soz. L’èr-la, ou i fé in gran sign do kroi épi ou i sign, é kan ou na zan-nui, ou i di : « Démyé, moin té kass mon zanm so zour la ! ». Na in n’ot afèr moin la fine antann : i di pa « l’inyon sé la lite ? »… donk si ou n’a in z’alyé é ou i vé li fé pa ou in kanikrosh, bin ou na bézoin in pti z’afèr kont li. Pa in gro ! zis in pti de fason, si i fo, fé fèrm son také.

Donk, si moin té lo délégatèr, moin noré méfyé. Méfyé zounou ! Méfyé zanbèk ! Sa i ariv kan ou i bès la gard.

 Justin

NB : Mi koné d’ot zélu la pa gingn la mèm shans ké Virapoullé... Shakinn son shans ! Shakinn son shias !