Na dé-troi zour, dann in radyo pèrkal, moin la antann in z’istoir. Sé TAK té i koz. Li rakont, konm l’avé poin tro d’lo dann Tampon, li l’avé fé mèt in sitèrn dan la kour la méri. Aprésa, l’ariv ali sak tout demoun i koné, é Didier Robert la vni mèr la komine. I paré, promyé z’afèr li la fé, sé fèrm do lo la sitèrn pou tyé bann flèr. Aprésa, mésyé Didier la kontinyé fé son travay démolisèr, mé konm zot i oi, li l’avé bien komansé.

Dann in sobatkoz dsi in radyo, an parlann bann projé, Iznogood, ki vé èt mèr la plas lo mèr, la di, nana déza bann prozé sak lé dann tuiyo, i fodra fé, épi lé zot va vni apré. L’èr-la, moin la mazine Didier Robert, Annette mèr Sin-Dni, Marco Boyer l’ansien mèr La Plaine, épi d’ot ankor, kan zot l’ariv mèr, zot la kasé, pti pé bonpé, mé zot la démoli, sof aprésa, kèl kantité l’arzan inn-dé komine la dépansé pou pèy bann pénalité. Zot i koné kosa lé riskab ariv la Réjyon pou an avoir koup l’artèr lo tram-trin ? I anparl d’in pénalité rant san-sinkant épi dé-san milyon... Ki vivra véra, mé lé bien posib sa i ariv !

Donk, sanm pou moin, Alamélou i fé parti bann moun i siport pa in n’afèr sé pa zot la fé. Donk si i done ali le l’okazyon, mi pans li va tap dann ta pou tout sort rézon épi san rézon arienk par rapor son shoviy la gonflé. Mi pans la popilasyon i done ar pa li l’okazyon pou égzèrs talan, sansa tansyon lo nouvo démolisèr.

NB : Mèt èk sa, lo mèr Sint-Sizane sar lo prézidan la CINOR, é zot va konprann lo danzé pou la popilasyon, pou lo bann travayèr, pou lo bann l’antropriz. Aprésa, nou va gard la figuir bann travayèr batiman lé dsi lo list do droite pars zot nora amèn zot grinn sèl dann travay pou détrui.

 Justin