Matante Zélida la ékrir Justin :
Mon shèr nové, mon spès monstré,
Alor, koméla, pou bann rouj-de-fon, na pi lo droi plézanté, na pi lo droi fé rir in pé la boush ? Lé vré, in minis La Frans la plézant déssi in z’arab. Lé vré sa ! Mé li l’avé poin l’intansyonn malfèr. Li té i vé mèm pa vèks lo boug ! La pa in bougrès konm moin zot va fé kroir lo bann moun la monte so pyèz-la kont lo ministr i kroi séryèzman méssyé Ortéfé lé rasist ! Byinsir, zot i kroi pa sa, mé sé z’ot manyèr fé la politik. In politik malprop, konm d’abitide ! Tok, pran sa pou ou !

Justin la fé pou répons :
Mon vyé matant, k’i koz toultan la boush rouvèr,
Vi parl pou La Frans ? Byinsir, sé in sitiasyon ké ou i pans konète, mé ké ou konm moin ni koné pa byin pou vréman. Mé si lo kozman méssyé Ortéfé la fé déga konmsa dann l’opignon, sa i vé dir li la di in n’afèr té i falé pa dir… é pou moin, lo gro léspri la pa inn l’éskiz ! Mé issi, matante, issi dann nout ti-patri La Rényon, ni soufèr d’so kansèr k’i apèl rasism : pa solman zordi, mé dépi lontan. Dé foi i jir demoun kan i anparl landroi zot i sort, z’ot koulèr, manyèr z’ot shové lé tourné, épi d’ote z’afèr ankor. Matante, tansyon déga, dann kèr épi dan la tète demoun, tansyon pa fé rouv in mové sikatris. Mèm an plézantan.

Justin