« Tap dsi troi pate. »

Mésyé, Médam, La soyété, koz èk moin sé koz èk in kouyon, mé sé o pyé d’lo mir k’i oi lo mason. Défoi i di galman : « tap dsi troi silind », mé inn konm l’ot sa i vé dir la santé lé pa gayar ditou. Dann in ka konm dan l’ot i konpar lo kor avèk in motèr, é konm in motèr néna kékshoz i klosh pa d’dan. Astèr si i di : « kar d’tour » sa i vé dir ou lé gayar vèy pa koman é si i domann aou : « koman i lé ! » sansa « koman i pète » sé la répons ou i pé doné. Solman si ou lé rant lé dé, rant lo bone santé épi lo movèz santé ou va di « konmsi konmsa ». Ou i pé galman domann in moun si li lé bien, mé konm i di a out risk é péril, la pèrsone i pé réponn aou : « Sé lo bien k’i mank amoin ». L’èrla nou lé pi dann karo santé mé dann sète la rishès, sansa la povrété. Alé ! Mi kite azot rofléshi dsi zot problèm santé é lé z’ot. Ni artrouv pli d’van. Sipétadyé !