Matant Zélida la ékrir Justin :
Mon shèr nové, mon spèss salté, rouj-de-fon dovan l’étèrnité, moin la bien lir dann z’ot zoinal zot kozman dsi parti kominis rényoné pars li l’avé soisantan somenn dèrnyèr. Moin téi atann téi sar asplik pou kosa parti-la la dsann la pant konmsa. Si konm zot i di zot néna rézon, alor, pou kosa li la dsann la pant konmsa ? Pou kosa li la pèrd lo poin konmsa dann l’opinyon ? Pèrsone rant zot la pa fé konprann amoin sa é mi dout zot mèm la fine konprann kosa l’ariv azot vitman konmsa. In sèl rézon mi oi, sé ké zot na poi rézon konm zot i di, mé zot néna tor, plito. Tok ! Pran sa pou toi 
 !

Justin la fé pou répons :
Mon vyé matant ki koz toultan la boush rouvèr, mi konpran bien sak ou vé dir amoin la mé la pa pou sa mi donn aou rézon. Pou kosa ? Nou néna tor sansa nou néna rézon, mé ni pé di lé shoz otroman : Pou mon par mi diré plito dsi la pozisyon nout parti néna é mon késtyon sé : pozisyon-la lé just sansa èl lé pa. Lanaliz nout parti la fé ! èl lé just sansa èl lé pa ? A bien rogard lé shoz, mi pans èl lé just . Sa i vé dir tardra viendra mé momandoné la majorité d’moun va rann azot kont de sa.
Ni pé traduir sa konmsa : L’asimilasyon lé bon pou nou, sansa lé pa bon ? Mon répons : èl lé pa bon.L’intégrasyon lé bon pou nou , sansa lé pa bon ? Mon répons : èl lé pa bon pou nou ! lo sistèm ni viv dodan, lé bon lé pa bon pou nou ? Mon répons : lé pa bon pou nou. Lo sistèm ni v iv dodan, i pèrmète anou dévlop nout péi oui sansa non ? Mon répons, li pé pa é donk li lé pa bon pou nou vik li la lèss anou dann sistèm néokolonyal-an kék mo li la kontraye nout libérasyon é sa lé pa bon pou nou. Li la kontraye nout dévlopman é sa lé pa bon pou nou . Li la kontraye nout solidarité indianoséanik, li la kontraye nout solidarité internasyonalis é tousa-la lé pa bon pou nou.
A s’tèr si ni parl nout réisite politik, lé vré nou la pèrd lo poin, mé la pa pou sa mi diré sé in pèrt définitif. Néna dé o épi néna dé ba. Donk si zordi ni pass par in ba, sa i vé pa dir domin ou sansa apré ni pass ar pa par in o. Dann lo pasé nou la déza konète sa, é na poinn règ pou dir anou ni arpran ar pa favèr. Ala koman mi pans é moin lé sir é sèrtin l’avnir lé de not koté, di koté nout parti, si koté bann fors viv nout pèp rényoné . L’avnir va donn anou rézon !