Matant Zélida la ékrir Justin :

Mon shèr nové, mon spès salté rouj-de-fon dovan l’étèrnité,
Konm vi koné mi èm la politik. Konm vi koné moin lé an tou-tan in partizann la droit. Pou kosa ? Pars vi koné bien, mi èm pa bann rouj. Pou kosa mi èm pa zot ? Pars zot lé konm pèrsil, zot i lav pli blan an parol, mé pa an aksion. Zot lé pou lo pèp a in kondisyon ké lo pèp lé pou zot. Zordi zot la bien afayi é sa sé in n’afèr k’i fé bien plézir amoin. Zot la si tèlman afayi ké d’moun i kite azot pou alé avèk bann droit… Myé ksa, i diré, an parol, zot i partaz tout zidé d’la droite, é lo zidé bann rouj zot la fine bour sa dann zot posh avèk zot moushoir par dsi… Mi koné kosa vi sava dir amoin. Vi sa dir amoin "lo ra i bandone lo navir !" Mé lo ra i bandone lo navir kan sète-la l’apré koulé. Tok ! Pran sa pou toi !

Justin la fé pou répons :

Mon vyé matant k’i koz arienk la boush rouvèr. 
Sa la pa in sogré pou ou, mé m’a dir aou kant mèm, in foi an plis, moin lé pa dakor avèk ou. Pou kosa ? Pars ou i parl gosh, ou i parl droit, ou i antèr anou ankor vivan. Dakor ! Mé mi antann pa parl program, parl z’idé… mi antann pa parl dévlopman, parl la politik l’inyon, parl lo rasanbléman pou konstrui nout l’avnir… Matant, gaskoné sa lé fasil, mé trouv in bon solisyon bann problèm sa lé pli difisill. Sirtou kan na in gouvèrnman gosh konm droit i oi pa pli loin ké son bout né. Pars, fransh vérité si nout parti l’avé été pli ékouté, lo péi nora pa été dann sète éta… si l’avé asé d’moun bone volonté, lé shoz nora été pli avansé… Kansa sa l’arivé ? Kan Paul Vergès la bien travay avèk Pierre Lagourgue épi avèk Camille Sudre, kisoi avèk d’ot ankor. Kansa ankor ? Kan dann konsèy jénéral bann konséyé kominis la bien travail avèk bann présidan kisoi d’gosh, kisoi d’droite. Konm di lo kont pèrsone nana tout la vérité, mé shakinn nana in bout. Shakinn i amen son pyèr pou konstrui la kaz. Tok ! Pran sa pou ou !