Ala lo tan pou vot lo bidjé:bann dépité avèk bann sénatèr nana in bon pé travay pou fé .Bon travay pou sak i vé lo bien pou l’moun, mové travay pou sak i s’anfou lo bien pou l’moun. Déziem kalité, i pé apèl sa, bann malfondé. An parmi lo bann malfondé, La Rénion nana in shanpion. Li lé mèr.In tan li lété dépité.zordi li lé sénatèr. Mi parl azot Virapoullé : na poin inn konm li lé kapab fé in mové kou, kisoi an piblik, kisoi an misouk.
Li nana in nouvo téknik, i apèl sa bann z"amendements". Koméla li vé fé rogoumant tout z’afèr. L’octroi d’mèr i sifi pa li, i fo li fé pass in taks an plis, rogoumant la taks sü sigarèt, étsétéra, étsétéra, la ké lo ra. Li vé atak la rézionalization sirtou lo bann pouvoir la rézion*.
Sa la rézion-la,kan li antann lo mo, son figuir i shof d’in kou.Son tèt i vien an roti brilé.Li va pèrd somèy si i fo, mé li doi trouv in manièr pou fé d’tor. Solman fé d’tor la rézion,fé d’tor la rézionalizasion, sé fé d’tor La Rénion, sé fé dtor lo pèp ! Li s’anfou d’sa. Moin la di azot, sa in malfondé. Fransh vérité ! Solman, mésié lo malfondé, tardra, viendra, nana in zour i apèl domin.

Justin

*voir la lettre de Gélita Hoarau dann “Témoignages” mardi 12 désanm 2006.