Moin na dan l’idé l’imanité i koné pa kosa lé riskab ariv aèl avèk in prézidan konm Trump pou diriz bann zétazini. Mèm sak i fo pa toushé li toush ! Mèm bann poin la diplomasi i konsidèr konm la lign rouj, pou li napoin in lign rouj. Astèr, li sort désid li vé pran Zérizalèm konm la kapital Israèl.

Sa sé in vré ni d‘gèp sa. Pou kosa ?

Pars Zérizalèm sa sé la kapital La Palestine toulmoune i koné, é ziska zordi l’avé arienk bann réaksyonèr intégris pou réklam in n’afèr konmsa... Bann prézidan l’Amérik ziska isi l’avé zamé pran in désizyion konmsa, kisoi bann prézidan démokrate, kisoi bann prézidan répiblikin. Mé ala k’in prézidan l’ariv la par kou d’milyar i déside in n’afèr konmsa.

I fo dir gouvèrnman Israèl lé porté par bann gouvèrnman l’Amérik é si la ba dann Washington té i bate in pé for lo poin dsi la tab nana lontan Israèl nora té fini sédé… I fo dir ankor tout lo kan oksidantal la touzour été mèm konplis avèk l’Amérik. I fo dir ankor bann péi z’arab la plipar d’tan lé pli okipé pou fé la guèr rantre zot pou kontrol lo moiyin oryan ké pou ède bann paléstinien artrouv z’ot tèr, artrouv z’ot patri.

Zordi ankor, plis soisant dis z’ané apprès la guèr 1939-1945 bann paléstinien lé dispèrsé in pé dann tout péi é lé kaziman inposib a zot artrouv in patri, in péi pou zot viv rantre zot dan la pé avèk l’imanité... Na in dalon i di amoin toultan, bann l‘oksidan épi d’ot ankor la si tèlman fé souf bann juif dann la guèr ké sé dsi lo do bann palèstinien ké zot i fé pénitans pou an avoir fé. Li di amoin galman, sanm pou li, zordi Israèl an konplisité avèk in bonpé péi i pass son tan pou fé soufèr lo pèp palèsinien, fé sibir azot i martyr san fin. Arzout èk sa Israèl nan ala bomb atomik alor zot i pé oir kosa lé riskab arivé.

Tanka Trump vi ké sé par li nou la komansé li komand lo promyé puisans mondyal é li nana sirman lo kapasité pou fé in tor inkroiyab l’imanité, mé konm i di : « Ki vivra véra ! » é tardra viendra, néna in zour i apèl domin.