Matant Zélida la ékrir Justin :

Mon shèr nové, mon spès salté rouj-de-fon dopi lontan kaziman in l’étèrnité, alor koméla sé troizyèm laz i manifèst pars i tienbo in taks dsi z’ot rotrète-i rogoumant la CSG konm i di, é sa i dévir z’ot po jak dovan déyèr. Mi di zot pars gouvèrnman la di, i toush ar pa bann ti rotrète. I rogoumant ar pa lo CSG dsi zot. Ankor myé firamézir va siprime lo taks d’abitasyon é zot va artrouv azot avèk in méyèr nivo d’vi. Makron la di, Makron la fé, Makron la komandé ! Sote koman ti vé koko, toué lé pri dan la min korbo. Tok ! Pran sa pou toué !

Justin la fé pou répons :

Mon vyé matant k’i koz touzour la boush rouvèr, ala ankor la kalité d’kouyonad la droit-Makron sé in om de droit ! Zot lé dakor èk moin ?- i mète dann bann koko frajil… Myé avèk moins : sé sa lo rangène matant é ou lé paré pou kroir in n’afèr konmsa. Sanm pou ou bann fransé i sava gingn in rogoumantasyonn rovni. Vi pans vréman zot lé parti pou sa ? Vi pans vréman, Konm i di, Makron i sava mète in koush do bèr anplis dsi lo zépinar bann fransé ?

Sak lo pla lé déza gonflé mi an dout pa. Dayèr la fine komans diminyé l’inpo dsi bann grann fortine é sirtou pou sak néna z’aksyon dann bann l’antropriz. La pa pou sak z’ot famiy la lèss in kaz pou zot dann in l’androi lo pri limobilyé la goumanté. Bann rish pou vréman, mi dout pa, moin lé mèm sir, i sava gingn in bon moné pa lé zot. Lé zot, konm i di isi, dann péi bourbon va sirtou manz patate avèk la po.

Tank a la siprésyon la taks labitasyon, kont dosi, fyé pa tro. Va komans bésé, sa lé sir, mé pou ranplas pa r koué. Kosa ? Oui i pans i ranplas ar pa ! Ou i pans bann komine va lèss dépouye azot konmsa ? Tardra, viendra, néna in zour i apèl domin.