Mé zami, mi pans konm moin zot la antann kozman mésyé Macron la di dann télé. Dizon, moin la antann ali, mé moin la pa ékout ali pou vréman : antann avèk ékouté lé pa ditou la mèm shoz. Mi antan : sa i vé dir out kozman i ronrone dann mon zorèye, shant out kont domin out fète. Si mi ékout : sa i vé dir mi obéi aou, ex : I fo ékout son paran ! Mé konm pou moin ékout avèk obéi sé lo mèm zafèr, moin lé pa dispozé pou ékout ali. Dabor koman ékout in kozman kan ou lé sir lo kozèr l’apré koz konm in liv rouvèr.

Pou koué mi di sa ? Pars moin la fine romarké lo troi froliké la vni prézidan inn apré l’ot-mésyé Sarkozy, mésyé Holland épi mésyé Macron- zot i koz mé kan zot la fini sé zot bann manèv-bann minis si zot i vé-i fé sak zot i vé, é anplis ké sa néna in kantité zéspèr pou intèrprète la parol lo mètr, sé zot, final de kont i amenn la politik.

In légzanp, moin té apré ékout lo bann zéspèr é banna té apré parl lo troizyèm laz-é zot téi di, si lo konfinaz i doi arète pou la plipar d’moun li doi kontinyé pou lo troizyèm laz. Pou koué ? Pars banna lé riskab gingn la maladi é anplis zot va kout shèr la sékirité sosyal vi ké zot lé riskab gingn in form grav la maladi. La voi d’zot mètr ? Pé s’fèr mé sak i di sa, moin lé sir li kalkil pa lo rol lo troizyèm laz i zoué dann la sosyété.

Dann tout domène : kisoi lékonomi, kisoi dann tourism, kisoi konm pasér d’rolé, pasèr d’kiltir kisoi pou ède bann paran okip lo bann ti zanfan. Dann sèrtin péi, bann vyé sé bann saz é zot na droi lo réspé pars zot néna lo savoir, la réfléksyon, la sazèss.I rosanm pa lé konmsa dann koko bann tète dozèf. Ala bann kozèr i di : « Va dékonfine bann vyé, biensir ! Mé kan sar fine trouv in vaksin pou songn zot malaldi. Bien antandi i domann pa bann vyé zot poinnvizé, kosa zot i anpans bann fèrblan vide i fé bonpé dézord é i prétan déside pou zot.

Si i kontinyé i trouv ar pa vaksin avan in an, pétète dé, pétète plis é si i ékout azot bann vyé va rèss an rézidans sirvéyé ziska sé pa kan. Va lèss azot in domi-vi, in kar d’vi pétète alé oir lo bann koko fromaz nora lo droi profite la vi a san pour san. Mé Tardra, viendra, néna in zour k’i apèl domin ! Kroiyé moi.