Lir in lèt pou in moun, sé rann ali sèrvis in foi, aprann ali lir, sé rann ali sèrvis mil foi. Kalkil azot sa bien, zot va oir, lé pa mantèr di in n’afèr konmsa... Kossa mi antan inn-dé monstré l’apré souf dann zorèy zot kamarad ? Kossa mi antann inn-dé tète-an l’èr l’apré grongn dann z’ot barb ?... A bon ! Na pi dmoun i koné pa lir koméla ! Oté, poitan zot i vé ou bien zot i vé pa, nana près san-vin-mil moun dann nout péi i koné pa lir.
Alor, kan mi antan la rantré i ariv, dann mon kèr, mi pans sé plito in bon nouvèl : konm sa va diminié lo shif demoun i koné pa lir... Sirman ! Sof ké, pou bann moun la fine kit lékol, i tonm in pé tar : « Avan l’èr, la pa l’èr, apré l’èr, la pi l’èr ! ».
Mé pou bann marmay lé an az aprann lir, ékrir, kossa i fo fé kan i an apèrsoi gouvèrnman i fé pa sak i fo, i fé pa sak i pé : par égzanp, kan i siprime plis onz mil l’amontrèr, épi va siprime ankor trèz mil lané k’i vien ? I pé pa di nora poin konékans ! I pé pa di i sava pa bord ankor in bonpé marmay, priv azot linstriksion.
Alor, kossa i fo fé ? Fé in prosé l’Éta ? Akoz pa, vik sé son boulo é k’li fé pa konm k’i fo ! Si lo danzé lé “imminent”, mi pans na moiyin moiyéné...Tardra viendra, sa v’arivé !

Justin