Moin na poin konm abitide suiv bann gran grèk dann zot manyèr pansé. Mi rogard pa laktyalité mèm manyèr ké zot. Solon moin ! Sa i prouv pa ké zot na rézon é moin tor ou vèrsi-vèrsa. Mé kék foi, i ariv déssi in késtyonn sosyété, sansa déssi laktyalité ni pans in pé parèy.
Par ébzanp : dépi in bon pé d’sominn, mi rogarde dann télé, kossa gouvèrnman la France l’apré fé avèk bann Rom, sansa bann zan-di-voiyaz, é mi kash pa dir azot sa i mète amoin an kolèr, dé foi mèm i pèrs mon kèr. Kan mi oi in bann polis, in bann gro kapor, avèk la déguènn in bann koboy, é bann gro-gro matéryèl modèrn, apré démonte san pityé in kanpman. Kan mi oi, toutinkou, in traktopèl kraz in kou in sèl in pov pti karavane. Kan mi oi dé madam rézonab apré sèy kouri pou pa lo traktopèl i kraz azot. Arzoute ankor, kan mi antann in minis, sansa lo prézidan li-mèm apré ankouraz in n’afèr konmsa, la raz i pran amoin, konm zot ossi mi pans... konm mon bann dalon mi éspèr. La raz i pran anou, épi larm i pèrl dann nout zyé.
Alor kan mi aprann ké lo pap, li-mèm, la fé in roprosh la-dsi, bann lévèk la primann gouvèrnman, bann lorganizasyon internasyonal la déklar sa i fé pa... l’ONU, l’Europ épi d’ote ankor... mi ariv a dir, pou in kou, moin lé dakor èk zot. Mi pans mèm dann mon kèr, k’in gouvèrnman i fé z’afèr konmsa, li ronyé lo bann valèr son péi, é mi mète a révé, lo zour, konm di lo konte ké so prézidan-la, konm so gouvèrnman-la, zot pouvoir, in zour, san tardé i ésploz an vol. Tardra vyindra, sa v’arivé.

Justin