Kan dann troi kar in vi ou lété kont kékshoz é ké toudinkou ou lé pi kont sète afèr-la. Kosa sa i vé dir ? I vé dir ou té pa tro fèrm dann out konviksyon. I vé pétète dir galman ou la ramoli avèk lo tan. Mé in pé i di nana arienk bann z’inbésil i shanj pa d’ l’avi donk, d’apré zot, ou i pé shanj l’avi konm i shanj palto.

Mé par l’fète, moin lé sir zot l’apré domandé ousa Justin-la i vé alé, dann kèl trikmardaz li vé aral azot. Zot lé a d’mandé pou kosa mi di sa ? M’a dir azot sé sinploman pou la késtyonn miss. Antansyon, ziska zordi moin lé pa pou in n’afèr konmsa, pars mi pans touzour ké dann sète afèr-la, bann jenn-fiy, sansa bann fam lé in pé konsidéré konm in marshandiz. Lé ga, zot i koné nana in bonpé militan té i pans konm moin pandan in bon bout tan. Mé zordi, i diré ké zot la ramoli dsi la késtyonn prinsip.

I pé mèm di, ké si zot la ramoli dsi prinsip-la, zot la ramoli dsi in paké d’prinsip épi in paké d’lopinyon. Touléka, mi koné in ta avèk in paké : rouz flanban momandoné, roz bonbon in pé apré, pétète zordi blé mèm blé marine. Mi koné in pé i pans mèm na pi d’klas dann la sosyété é ké lo kapitalism lé pa si tan mové ké sa, é ké son zanfan batar k’i apèl kolonyalis lé bien akséptab pou zot, konm pou in bonpé zordi.

Na mèm in l’ansien bon kamarad la di amoin : o moins dann sète afèr-la la démokrasi lé réspékté pars i fé vot lo jury épi tout sak nana téléfone portab. La pa mon avi biensir é moin la di ali konm mi di bann z’ansien kamarad : « Tazantan pins azot in pé pou oir si zot lé pa apré révé ! »