Plis lo tan i pas, o plis lo zafèr i vien difisil pou konprann ; gouvèrnman fransé la di li téi koné téi sar fé in trikmardaz konmsa, solman li la poin lo pouvoir pou défann sa. Gouvèrnman lo Tchad i di bann zanfan tousèl la pa zanfan tousèl akoz zot nana zot famiy, épi zot i sort pa Darfour, mé zot i sort le Tchad. I di mèm bann sèrvis ségré la mélé. Étsétéra, la ké lo ra.
La fine tèlman mayé, la fine tèlman manti, mi kroi pa in zour va niabou oir klèr déssi so zafèr-la.

Sa i ramène dann mon tèt zistoir bann zanfan La Rénion la DDASS la anvoy dan La Creuse. Kossa té i di bann famiy : zot zanfan sar mié la-ba, va anvoy azot lékol, zot nora in famiy va fé tout pou zot. La mèm di, tazantan va pèy biyé lavion pou zot artrouv zot vré famiy. La téi manié bann zanfan, épi zot bann paran pou sèrv in politik : anpèsh La Rénion an aoir lotonomi.
Lo tan la passé : banna la fine fé zot vi, mé sak lé vivan lé konm demoun bléssé, dann zot kèr épi dann zot kor. Alor, mi pans, sof si la pa possib, zanfan i fo lèss azot dann zot famiy. Vol zanfan la pa in solision !

Justin