So matin, moin la lir in pti l’artik dann in zournal la droite. Té i parl Emmanuel Séraphin, in ga té i doi, konm pa, prézant dépité dann sétyèm sirkonskripsyon. Kosa mi lir dann l’artik-la ? Mi lir, dann sirkonskripsyon-la, demoun Sin-Pol i roprézant in tièr la popilasyon donk trann-troi mil pèrsone a popré… Kanton Troi-Basin i fé in pé plis sèt mil… komine Sin-Loui i fé sinkant mil, donk an gro, vinn-sink mil par kanton. Sin-Lé i fé trant-é-in mil. Z’Aviron i fé dis mil. L’Etan-Salé sé trèz mil sink-san pèrsone.
Donk, dann sétyèm sirkonskripsyon, nana soisant-sink mil pèrsone i abit dann inn komine la gosh. Lo mèr lé kominis, sansa i fé parti l’Alyans. Karant-é-in mil i viv dann in komine lo mèr lé Modem. Trèz mil sink-san dann in komine lo mèr lé UMP. Astèr, si ou i kont an kanton : PCR é l’Alyans sa i fé kat kanton, troi gro épi in pti. Lo Modem i fé troi kanton, dé moiyin é in pti. L’UMP i fé in pti kanton.
Si Huguette l’avé ékout son parti, pèrsone té i tap pa li dsi dé kanton Sin-Pol, dsi Sin-Loui, dsi Troi-Basin, dsi kanton Piton Sin-Lé, donk l’avé poin pèrsone pou tap ali dann sétyèm sirkonskripsyon. Donk, sanm pou moin, èl la fé in mové kalkil. L’èr-la, èl lé dann malizé dann dézyèm, épi son dalon, sof ki li lé, sar dann malizé dann sétyèm.
La zéografi épi l’istoir, sa in ’afèr i pé ansèrvir, mèm dann ka in z’éléksyon si ou i koné bien lir ali. Sin-Pol ? In komine Parti kominis lé for. Troi-Basin ? Na lontan la fine dékap la droite. Sin-Lé ? Parti kominis lé for, na z’éléktèr pou mobilizé. Sin-Loui ? Lo parti lé for, é lo mèr l’Etan-Salé la pa Hamilcaro. L’Étan-Salé, nou nana nout moun.
Huguette Bello, té pa la mor pou ou, té la gloir pou ou ! Mé l’orgèy té tro for ? Shoviy gonflé na poin la rézon.

 Justin