Mésyé, Médam, La sosyété, koz èk moin sé koz èk in kouyon mé sé o pyé d’lo mir k’i oi lo bon mason. Mé zami ala in provèrb i sort péi Kongo. Pa lo gran Kongo i apèl souvan RDC, mé lo pti Kongo sak néna pou kapital Brazzaville. Zistoman demoun Brazzaville i ansèrv kozman-la… An parlann fé, zot i koné néna désèrtin i pran difiisilman mé kan li lé pri li lé pri é ou i gingn fé out didine trankilman. Néna d’ot i pran vite, mé lé pa rar k’i lash aou an rout pars son fé i pran pa vréman dann kor in boi dir. Sa lé vré sa, mé kosa sa i ansèrv anou dan la sosyété. Kosa k’i ansèrv ? Mézami zot la fine antann sak i apèl demoun soupolé ? Doléi dsi l’fé li bouz pa, konmsi li amorti la shalèr é toudinkou, l’èr ou la dévir in pé out tèt, ala k’li mont d’in kou é si ou la pa nyabou kal ali : TChouaaaah ! ! !, Li vèrs dann fé. Si ou la gingn kal ali, lo lé i dsann tout suit é ou lé sové. Demoun soupolé pou in oui pou in non zot i pran la kolèr, mé zot i koup zot l’ardèr pli vite ké zot la pran. Donk, étone pa si laba dann Brazzaville demoun i kass tiboi bann kolérik avèk lo kozman moin la mark an-o al. Alé ! mi kite azot rofléshi la dsi é ni artrouv pli d’van. Sipétadyé.