Mésyé, Médam, La sosyété koz èk moin sé koz èk in kouyon mé sé o pyé d’lo mir k’I oi lo bon mason. In sinp kozman pou dir lo dèstin lé shanjan : inn lé rish mé li pèrd tout son bien, l’ot lé o flan mé I fé fortine. Mèm pou sak la manz son soup avèk in kiyèr an larzan, mèm pou sak la manj la mizèr dann pla bréshé. Fransh vérité, si na d’moun I kroi sa san pour san, tanmyé pou zot. Moin la konète in moun té in zanfann rish é aprésa kan li la grandi li la rèss rish mè solman li téi di partou li té in zanfan la mizèr é sak téi vé, téi kroi, sak téi kroi pa téi di li lé mantèr konm in rasher d’dan. Solman antansyon mi di pa zot lo dèstin lé pa shanjan, mé solman dsi la marj é pou in pti trépé d’moun. Alé ! Mi kite azot rofléshi la dsi é ni artrouv pli d’van. Siétadyé.