Médam, Mésyé, La konpagni koz èk moin sé koz èk in kouyon, mé sé o pyé d’lo mir k’i oi lo mason. Mé zami la vi sé tazantan in drol de vi, é la sosyété in drol dé sosyété. Zot i koné, mi pans, kozman i di konmsa : « intèl i koup dë koté », sansa I di osi « sa kouto détayan sa ! ». Mi pans sa sé in n’afèr k’i doi dir azot kékshoz. Pars zot konm moin é konm d’ot nou la viv dann désèrtin drol sosyété avèk drol moun. Solon zot lé posib ète dé koté an mèm tan ? Konm Zida avèk Zézi é kontre li-konm Figaro avèk Elie é kontre li.I mank pa zégzanp konmsa dann listoir. Mi pé rakont azot in zistoir sinp é anplis sa la éspass La Rényon, dann kartyé moin lé né. Ariv in zéléksyon, gramoun Félix militan i fé la tourné lo moun dakor avèk li é li domann inn si so kou isi li marsh. Lo moun i réponn : « Konm par l’pasé mésyé Félix ! ». Mé landmin lo zanvlop la rouvèr é tout demoun la romark lo moun l’avé pa vote konm par l’pasé. Alé ! Mi kite azot rofléshi la dsi é ni artrouv li d’van. Sipétadyé !