Zot i koné pou sorte Boi-Dnèf é pou alé lékol Sinte klotide é ariv a l’èr lo famé lékol lété pa fassil toulézour si an pliss wi viv toute kalité zavantir konm toute bann marmaye oute laz ébin étone pa k’in zour lo pti Féliks ou Féliss l’ariv lékol an rotar. La klass té fine komanssé.Si mi di azot li l’ariv an rotar lété pa san rézon. Lété pars dsi lo shomin l’avé in troupo Zoi é té pa rar lo zoi téi anpèsh bann marmaye passé é sé sak l’ariv Féliks ou Féliss so zour-la.

Arivé la, lo marmaye la vi lo mètr té apré fé son téaté konm dabitide mé rozman si néna la porte n’avé ossi la fénète é lo marmaye la fé pass son sak par la fénète épi li la rante par la fénète mèm konm li téi di li-mèm : ni vu, ni konu é jé t’anbrouye. Bonpé marmaye téi fé sa donk pa d’problèm. Sof ké… Zour-la, zour d’shyass bann marmaye la raporté. La di : « Néna inn la pass par la fénète ! Néna inn la pass par la fénète ! ». Lo mète la kal nète dann son pa d’danss é la di : « kissa la pass par la fénète ? ». Pèrsone la pa réponn sof bann raportèr la di : « Féliss la pass par la fénète ! Féliss la pass par la fénète ! »