Lakey lo sit > Chroniques > Oté
Téléfone portab, oui sansa non !
mardi 14 out 2018, sanm
Mon bann dalon, mi sava dir azot in n’afèr, moin lé sir é sèrtin i sava prann azot an robrouss poil… konm i di. An sans kontrèr d’lo poil si zot i vé bien. Mi sava anparl azot téléfone portab dann l’ékol. Zot i koné gouvèrnman la fé vote in loi, sansa la fé parète in l’arété, pou défann ansèrv téléfone portab dan l’ékol épi lé z’alantour.
Pou kosa gouvèrnman la désid fé pass in règloman konmsa ? Pars d’apré bann koko fromaz i gouvèrn anou, sa sé in n’afèr i ansèrv pa rien ni bann marmaye, ni bann mète, ni l’édikasyon nasyonal an zénéral. Donk soi ou i dépoz out l’aparèye dann in kazyé, soi ou i amenn pa li avèk ou, an touléka ou i ansèrv pa sa pou pètirb l’édikasyon. Akoz bann zélèv solman ? Akoz pa bann mètr, akoz pa bann pèrsonèl la kominoté édikativ ? Mistèr épi boul de gome.
Inn-dé paran la vol dann ta. Zot la domann koman zot v’ariv a zoinn z’ot zanfan kan zot sar an rotar ? Koman zot va pran nouvèl dirèktoman avèk z’ot zanfan kan zot la pankor koz avèk li dopi omoins in domi-zourné. In domi-zourné sa lé long mon fra. Si mi tronp pa zot i pans i sava siprime azot in lobzé dé trankilité, pou zot épi pou z’ot marmaye. Solman oila, zot i konpran i pini bann marmaye pèrtirbatèr é mèm i konfisk z’ot télé fone.
Figir azot, moin néna in kamarad i fé sak li apèl l’ède imanitèr avèk bann lékol Madégaskar. Donk mi di ali, moin néna in gro l’ordinatèr fiks, i marsh ankor, si li vé amenn sa pou in lékol dann l’androi li sava la plipar d’tan. Li la rogard amoin, konmsi moin téi sort déyèr solèye épi li la di, dann l’androi li sava bann marmaye i travaye avèk z’ot téléfone portab Sa i an sèrv konm liv, konm diksyonèr, konmgramèr épi an zénéral pou fé z’ot travaye lékol é lo mètr i trouv bann marmaye i travaye myé.
Moin pèrsonèl mi koné pa l’androi li sava mé si lé vré sak li di, ké lo portab sé in l’instrimann travaye, nout bann koko fromaz l’édikasyon nasyonal i pran in mové shomin . Ou i pé travaye in késtyon téknik avèk sa, ou i pé travaye in lang avèk sa. Avèk out mètr ou i pé fé in program pèrsonalizé. Alor télé fone portab oui sansa non ? Mi pans sa sé in késtyon inportan i pé pa règ an dé kou d’règloman.
é ni artrouv pli d’van. Sipétadyé !