Mézami dopi k’la Rényon sé La Rényon, kassèr lé kui la touzour égzisté épi galman demoune vilktime lo bann kassèr lé kui. Sa lé vré dann la kour l’ékol, sa lé vré dann la sossyété an zénéral, sa lé vré dan la boutik, — dann toute l’androi néna in sossyété lé konmsa.

Donk kossa i fo fé dovan in sityassion konmsa ? Sibir, révolté, ziré, tapé, momandoné i fo in réakssion. I pé di i fo in réakssion apropriyé, mé zistoman opliss wi tarde pou réazir, opliss oute réakssion lé riskab dépass lé borne.

In zour in marmaye i romarke na pi d’ri kan li ariv pou manzé — i fo alé rodé é sa l’assé pou lé zot gogoz ali. In zour li ariv é na pi d’ri. Néna pi d’ri mé na bishik. Lo marmaye la vèrse lo pla bishik dann son zassiète é li la komanss manz avèk la raz.

Pèrsone la pa bouzé é mi panss lo bon tour lété fini so zour-la.

Mézami, mi kite azot rofléshi la dsi é ni rotrouv domin sipétadyé.

Justin