Pou son soisant an nout zournal la kas larmoir, la mét in linz név, la rant si internèt, é lo mirak i pous lo rèv dovan. In mirak akoz nou lé rienk inn ti pé pou fé viv ali, é sakinn i travay ék lo kèr, pou La Rénion.

Dopilèr “Témoignages” lé pi marké parti kominis, li la tir son fosi ék son marto. Li rés lo zournal Raymond Vergès é sa i vé dir inn sèl zafèr : mét rénioné anlèr, fé ansort nou lé trété konm in moun, in vré.
La fini lo tan ousa té mét anou pli ba k’tèr. “Témoignages” lé là osi pou mont lo gayar nou néna, tout lo gayar nou lé kapab, la zénès anparmi.

Zot i koné i trouv pa nout zournal partou, alors na in sèl manir gagne ali tou lé zour : l’aboneman. Alé di partou. Sa osi lo méyèr moyin pou lo mirak i rokomans toulézour.

Justin