Matant Zélida la ékrir Justin :

Mon shèr nové, mon spès salté, rouj-de-fon dovan l’éternité,
Vi koné la koup di mond fotbal sa i éspas la-ba dann Brézil épi Brézil sé in gran péi pou l’agrikiltir é an parmi pou lo pantaj kane. I fé in ta z’afèr avèk sa : do sik biensir, mé lalkol galman épi tout bann sou-produi ni koné. Bin, figuir aou, bann télé i profit lo laktyalité ésportiv pou anparl in pé lo péi. Sé konmsa, l’otrozour banna la mète a parl kane é dann so trin-la, la di konmsa Brézil i fé vni la somans kane in pé partou é ziska dopi La Rényon. La pa drol in n’afèr konmsa ! Lo pti rényon i ède lo gro Brézil pou amélyor son bann varyété kann. Mi di sa konmsa pa pou vanté, pars konm mi koné anou, pétète nout kane l’apré pous son dèrnyé soupir é in pé i anprofite dsi nou-dizon kan ou lé mor, ou i donn out l’organe !. Par l’fèt moin la pa tro antann désèrtin kriyé, kozé asiz dsi kat-kat pou défann nout propriyété dsi nout prop travay mé pétète sa i agard pa nou tro.Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, mi pans ou lé in pé an foutan ou la ! Pars dopi lo trikmardaz avèk Téréos n adésèrtin la pa obli mète an gard bann prodiktèr La Rényon pou dir azot lo travay nou la fé lé riskab ète pèrdi sirtou tout sak lo sant téknik kane avèk dosik la fé, avèk bann plantèr dopi bél-az é bo-tan.An promyé nou la di i fo fé atansion pars téréos i louk dsi lo kota La rényon pou li gonf son pla. Dé, la di osi si téréos i pran pou li san konpansé sak nou lé fine trouvé afors rodé, konm varyété d’kane, konm rishès an sik, ou sansa an fib, konm l’adaptasion par raport la tèr sé konm si ni tir in bal dann nout pyé. Pèrsone la pa kas la tèt ! Mèm bann plantèr té pa méfyan : tout lo moun il é bo, tout lo moun lé zantiy. Astèr ou i aprann bann brézilien i plant nout varyété kane san dépans in katsou, i fé zot marshé varyété isi an lib sèrvis… Astèr pli grav ou i aprann lé posib l’izine Boi Rouz i fèrm, pars nora pi d’kota ni d’pri granti pou lo sik a partir d’lané 2017... Matant ou va dir amoin i fé pa tro dézord la dsi ? Ou va dir amoin rényoné i sousyé pa défann lo kann ? Afors ète trayi lé shoz i marsh konmsa, an sharète shaviré. In pli pir z’afèr nou la fé sé lès vann nout téknolozi Téréos. I donn pa lo shat pou vèy sosis ! Tok ! Pran sa pou ou !

Justin

NB : Na dé troi zour, mi ékout in radyo. In ga i di li ; lé téknisien dan la kane apré kozé. Ala k’li di l’izine boi rouz i sava fèrmé l’ané 2017. Lo lanimatèr i dmann ali si li lé sir dsa, li fé pou répons moin lé dann l’aparèy sé dir si mi koné... Lé danzéré la !