Plantèr kann, zot i koné Laksmi Mittal ? Sasé lo roi l’asyé é lo moun lo pli rish L’Anglétèr. Konparézon la pa rézon vi ké lo boug d’apré sak mi koné i plant pa in pyé kann é bann é bann plantèr I oi l’asyé kan zot i trap z’ot gran kouto. Donk in drol késtyon ! Mé si i mète François Holland dann milyé lo késtyon I dovien pa bizar konm k’I diré.

Mittal l’ashète bann z’izine l’asyé la-ba dann la Lorène é ki di l’asyé i di galman in gran sant pou fé la roshèrch. Donk sa lé a li, mèm si bann fransé la travay dési l’asyé dopi dé san z’ané. Donk sak banna la trouvé lé a li, mésyé Mittal lo moun lo pli rish l’anglétèr. Fransoi Hollande la di : « Florange i fèrm ar pa ! »… gran promètèr dovan l’éternel, Florange la fermé é lo bann tik-tak banna la trouvé-z’ot l’invansyon – la fine parpiy partou ousa Mittal nana z’izine l’asyé.

Téréos l’ashté l’izine Boi-Rouj épi lo Gol, li l’ashète osi la roshèrch bann rényoné la fé dopi dé san z’ané. Koméla bann varyété kann invanté La Rényon i plant sa dann tout l’androi Téréos nana karo kann – gran gran karo, mi anparl mèm pa !.. Mésyé Hollande la di moi d’aout l’ané dèrnyèr : « Boi rouj i fèrm ar pa ! », é dopi so tan-la, li la pankor trouv in minite pou dépoz avèk l’Erop in domann pou ède nout prodiksyon kann.

L’èr-la, ni pé domandé si lo déstin bann plantèr kann i sava pa kroiz avèk déstin bann travayèr l’asyé é lo métod Mittal kroiz avèk métod Téréos, avèk Fransoi Holland konm mové z’anz gardien.

Nb « Parabol Fransoi Holande lo mové z’anz gardien »l la pa moin la invanté, sé mon kamarad Manu. Moin lé sir li va rokonète ali.