Léspri lo mal la poin limite ! Alé oir solman toutt kalité la loi la fé vote an Frans dsi la késtion limigrasyon : inn la pankor apliké, fé in n’ote ; l’ot la pankor apliké, fé travay bann fronksyonèr dsi in n’ot ankor. Shak foi, léspri lo mal i trouv in n’afèr pou fé an pliss. Biensir, i viol lo droi lo moun, karéman. Dèrnyé zafèr, banna l’apré kalkilé, fé bann test ADN dsi bann moun i vé rant an Frans - dizon, bann zanfan - pou oir si zot lé famy avèk in moun i travay déza dann lo péï.

Ziska zordi, té i fé bann tèst-la kan lavé n’afèr d’zistiss séryé. Zot i konpran ? Na d’ka pou fé sa. Antansyon, si la loi i déside i pé fé sa bann zémigré, la pi bon ditou ! Sé la loi èl-mèm va viol lo droi dmoun, an avoir in vi privé, in vi d’famy, in passé. Zot i konpran amoin ?

Assé boush lo zyé d’moun - po d’shanm la pa pla kouvèr -, assé fé kroir bann zémigré lé résponsab déga nana an Frans. Oubli pa nana arienk 1 pèrsone dsi dé mil na poin papyé pou arèst an Frans. Bann moun i fé statistik nora di 0,5 pou san.
Alor, kossa ni pé di, kan la kouyonis i gouvèrn lo péï ? La p’assé, mète ankor. Afor, alé a lo, kalbass i pète !

Justin