Lakey lo sit > Chroniques > Oté
Test mate épi test franssé ? In tro mové rézilta dan noute lakadémi. Pou kossa sa ?
vandrodi 17 novanm 2023
Mézami konm shak ané i tèst noute bann marmaye, pou konète kèl nivo zot néna dann matématik é dann franssé. Bien antandi noute rézilta lé mové paré-t-il dsi 28 lakadémi nou lé avan dèrnyé.
Késtyon : pou kossa, réponss : parské… é si mi di sa, la pa pou gougnardé, mé solman la vérité i oblij anou dir toute bann koko fromaz i prépar bann program pou nou, ébin zot i koné pa poukossa. A ! Bien antandi zot i di pa zot i koné pa, zot i di sinploman nou l’avanss in pé par rapor l’ané passé.
Kossa nou nora vouli ? Sinploman in léspèryanss é ké so léspèryanssi di anou, nou néna léspoir oir noute zénèss avanssé sinploman avèk léspèryanss-la zénéralizé.. Mé nou na mém poin léspoir in nouvo métode-si l’avé inn-nora amenn anou dann shomin la réissite.
Dabor lo shoi li mèm i poz késtyon : pou kossa i shoizi lo franssé, épi lo matématik, pars i éstime sa sé bann matyèr lé inportan. Akoz pa l’aritmétik, listoir, la zéografi, la kapassité pou invanté, épi d’ote matyèr ankor.
Mé lo franssé sé pou sak i bègn ladan dopi in bon boute tan. Lo matématik, pars i fo konprann lo problèm pozé sirtou si li pozé dann franssé.
Astèr mi yèmré dir issi la Rényon néna demoune i rofléshi la dsi : néna sak i di i fo in lansègnman bilingue… In l’ansègnman ! Pa lo kréom konm matyèr — donk lo kréol konm lang pou l’ansègnman. Témoignaz i parl de sa mé ziska zordi noute kréol lé loin d’ète in lang pou l’ansègnman — pou l’amontraz si zot i vé.
Mé sa lé possib épi rézonab si la lang kréol i ansèrv konm lang dann in léspass biling avèk lo mèm shanss ké la lang bann franssé. Si la pa sa, i sèrv pa rien é sar pa opérassyonèl ditou.. ; zot i konpran pou mwin i fo rovoir lé shoz dann lansègnman dopi A ziska Z
Mé kissa i sava rovoir in n’afèr konmsa ? mi panss sé pa domin la vèye.
A bon antandèr, salu !
Justin
