In kamarad shagosien la di amoin kozman-la. D’apré li, Lisette Talate té i di souvan sa. Isi la Rényon ni di plito ti-ash i koup gro boi mé konm i di, sé topète-morète, boi d’zalimète. Donk i vé dir la mèm shoz ! Mé par l’fète ziromon kosa i lé ? Si mi tronp pa ziromon sé lo nom in sitrouye é kan mi fouye dann mon mémoir, mi oi touzour in vyé zournalyé mon papa apré koup sitrouye avèk son pti kanif trann-dé avèk in lam si tèlman li lé pti, moin té i oi pa koman li n’arté kapab koup son sitrui an karé pou fé son kari. Poitan li téi fé é pa riyink in foi mi promète azot. Mi arète zordi dsi lo sans prop, épou lo sans figiré, mi pans m’a arvni dsi domin. Alé ! Mi lès azot kas z’ot tète dsi sa énou va artouv pli d’van sipétadyé.