Afèr pans toultan an arièr ? Afèr mazine ankor lo bann kouyonis la fé dann passé ? Gard an arièr, ou lé riskab kalbité, fé ankor plis la kouyonad, épi dépans ankor larzan an pli gran kantité. Ala pou kossa i fo fé vite pou règ lo bann problèm bann Rénioné pou oiyazé !

Oté, arète di zafèr konmsa ! Zistoman, sé akoz, dann passé, la fé in bon pé kouyonad k’i fo fé antansion pa arkomansé, donkalor gard ossi an arièr !

Pou mon par, mi trouv plito bien k’in bann zéli épi in bann léspésialis i désid rovoir la fasson lo tram-trin va travèrs la montagn. Lanvironeman, sa in n’afèr lé inportan, i fo pa amène sa an sharèt shaviré. Épi, koman i sava roganiz la vi dmoun shak koté lo trin i pass ? Dousman-dousman, firamézir... Mi èm galman la manièr i fé pou bien kalkil koman i sava dépans lo larzan : plis in n’afèr lé shèr, plis i fo bien dépans larzan san gaspiyé, épi san zoué an bète avèk la sékirité.

Bann gro léspri i pé mazine sak zot i vé, mé pou mon par, mi an apèrsoi, ti-lamp ti-lamp, tram-trin i fé son shemin : pti shomin-gran shomin.

Justin